Biden i shkruan Vuçiqit, ja çka i kërkon për Kosovën

“Shtetet e Bashkuara të Amerikës mbeten të përkushtuara për të avancuar bashkëpunimin ekonomik, stabilitetin rajonal dhe vlerat demokratike, por gjithashtu edhe mbështetjen e palëkundur për qëllimin e integrimit evropian të Serbisë“, ka thënë presidenti i SHBA-së, Joe Biden në një letër dërguar presidentit të Serbisë, Aleksandar Vuçiq.

Biden i dërgoi një letër urimi Vuçiqit me rastin e Ditës së Shtetësisë së Serbisë – 15 shkurt.

“Duke pasur parasysh 140 vitet e partneritetit midis dy vendeve tona, SHBA-ja mbetet e përkushtuar për avancimin e bashkëpunimit ekonomik, stabilitetit rajonal dhe vlerat demokratike. Ne mbetemi të palëkundur në mbështetjen e qëllimit të Serbisë për integrimin evropian dhe ju inkurajojmë të vazhdoni të ndërmerrni hapa të vështirë për të arritur atë qëllim, përfshirë reformat e nevojshme dhe arritjen e një marrëveshjeje gjithëpërfshirëse të normalizimit me Kosovën, e cila është fokusuar në njohjen reciproke“, tha Biden.

Ai shtoi se fuqia e marrëdhënieve midis dy vendeve bazohet në historinë e thellë të lidhjeve midis popujve që luftuan si aleatë në të dy luftërat botërore.

“Ne e vlerësojmë shumë kontributin e madh që serbët i kanë dhënë shoqërisë amerikane në shumë fusha. Ne gjithashtu vlerësojmë bashkëpunimin tonë të ngushtë në luftën kundër pandemisë së COVID-19, pasi përballemi së bashku me këtë sfidë të paparë globale. Unë pres të punoj për të thelluar lidhjet miqësore midis vendeve tona dhe forcimin e marrëdhënieve midis Serbisë dhe SHBA-së“, thuhet në urimin e Bidenit.

Be the first to comment on "Biden i shkruan Vuçiqit, ja çka i kërkon për Kosovën"

Leave a comment

Your email address will not be published.


*